Velkomen til haustens musikalske høgdepunkt i Bøverdalen sitt fremste konserthus – Aukrust Gard & Urteri!

Siste laurdag i september blir Aukrust Gard & Urteri fyllt med ei unik konsertforteljing i toner og tekst om jazz og storbyliv, folkemusikk og glamour, Gjendine og Jørgine. Om å reise ut i verda – og om å velje å bli på bygda. Framført av folkesongar Camilla Granlien, pianist Alf Hulbælmo og fiolinist Mari Skeie Ljones.

Jørgine Boomer (1887-1971) og Gjendine Slålien (1871- 1972) kom begge frå enkle kår i Bøverdalen – kor og Aukrust Gard & Urteri ligg.

Jørgine reiste over til Amerika, arbeida seg oppover og gifta seg med Lucius Boomer som seinare vart hotelldirektør ved Waldorf Astoria hotell i New York. Saman dreiv ekteparet Boomer hotellet fram til hans død. Jørgine vanka i sosieteten i New York, sørga for at Frank Sinatra fekk fart på karriera ved å gje Sinatra jobb ved hotellet som musikar, lytta til Cole Porter medan han komponerte, kjente presidentar og kongelege og var høgt elska av mange av sine særskilde gjestar. Jørgine reiste fleire gonger heim til Bøverdalen og bygde seg ein Villa Jotunheimen både der og i USA.

Gjendine derimot, var budeie og Edvard Grieg si største kjelde når det gjeld folkemusikk. Gjenine var født ved og døpt i fjellvatnet Gjende, og forlet aldri sin heimstad til tross for frieri og tilbod om sangutdanning i utlandet. Gjendine trollbatt folk med si sangstemme, ho var lystig og kjapp i replikken og kunne ikkje leve utan fjellet kring seg.

To sjarmerande damer med bein i nesa. Samtidig, to veldig ulike damer. Den eine med mye eventyrlyst og ivrig etter å reise og oppleve, medan den andre i staden lot verda komme til seg. Så ulike val og så ulike liv, men kan hende hadde dei meir til felles enn ein skulle tru?

Konsertforteljinga er tilverka i samarbeid med Riksscenen i Oslo, Fortellerfestivalen og Musikk i Innlandet – og er støtta av utvandrarjubileet Crossings.